ꆧꁨꇓꈓ
〈ꋍ〉
ꆧꁨꇓꈓ
ꆧꁨꑊꏦꅑꂶꌠ
ꑊꏦꐆꅍꌘꈈꀕ
ꆧꑭꒉꐑꁖꃅꁖ
ꀉꐔꉌꃀꀵꌊꆧꁨꇓꈓꆧꑭꇸꇬꎷ
〈ꑍ〉
ꇓꈓꀄꏈꇓꈓꇰꄮꇬ
ꌋꐓꀄꂼꈜꑀꅉꃅꆧꁨꇓꈓꃥꌵꆹꇬꎷ
〈ꌕ〉
ꆧꁨ
ꆧꁨꆹꅽꉌꂵꇬꀀ
ꆧꁨꆹꉠꉌꂵꇬꑌ
ꆧꁨꆹꋀꊇꉌꂵꇬꁨ
〈ꇖ〉
ꊌꆹꊌꉆꆏ
ꃅꆳꁴꀅꌳꀕꃅꊼꇅꁏꎼ
ꊌꆹꊌꉆꆏ
ꂷꉐꁴꀅꌳꀕꃅꊼꇅꐛꎼ
ꊌꆹꊌꉆꆏ
ꆧꁨꁳꅉꀕꐛꒆꎼ
〈ꉬ〉
ꆧꑭꇓꈓꐚꋊꂷꊂꌸꄹꉖ
ꒌꆠꑳꅉꀉꐩꀆ
ꈍꀞꈍꀞꀱꐯꑝ
ꏁꍿꏁꍿꐯꆼꈯ
ꑊꋌꑊꋌꐯꁶꌦ
〈ꃘ〉
ꉐꃨꋓꃅꃨꌊꈀꋩꀨ
ꏾꏂꍧꄹꊰꌊꈀꋩꀨ
〈ꏃ〉
ꆧꁨꒉꈁꃃ
ꆧꑭꆼꏻꌩꏂꆹꈈꎑ
ꉜꏂꇬꀺꎿꉱꀀ
ꄵꎭꐛꌠꄵꎭꐛ
ꐰꇑꐛꌠꐰꇑꐛ
〈ꉆ〉
ꁯꄹꀱꌊꊂꌒꂘ
ꒌꆠꀱꌊꍯꁧꋯ
ꌭꀕꌭꀋꄿ
ꐜꀕꐜꀋꄿ
〈ꈬ〉
ꌩꁧꋍꁧꎑꄉꆼꏻꌦꀋꏾꐛꅹ
ꆏꐂꌩꏪꇆꆈꃹ
ꆏꉪꑽꀐ
ꌩꏪꀉꄖꅉꇬꀉꐩꏃꂷꂿꑵꉬꅊꇈ
〈ꊰ〉
ꀄꂼꂻꇬꐗꃅꄃꉻꂻꐛꅹ
ꉹꊭꉹꄐꆪꁻꆹꄡꎭ
ꀄꂼꂻꇬꁴꍂꃅꐚꂻꐛꅹ
ꏁꍿꐊꄉꆪꈐꆹꄡꎭ
〈ꊯꊪ〉
ꌦꄔꌋꄔ
ꃅꋊꇱꄓꉆꄉꐞ
ꐞꅉꐞꅉꐞꅷꆗꌺꉌꃀꇬꄉꐞ
ꌦꃨꌋꃨ
ꐩꋊꇬꇉꀀꄉꃨ
ꃨꅉꃨꅉꃨꌊꀉꐔꉌꃀꇬꄉꃨ
〈ꊰꑋ〉
ꉩꇗꆧꁨꇓꈓꄩꄉꉎꉐꍓ
ꇓꈓꇐꀋꑌꇓꈓꎲꀋꑌ
ꇓꈓꒌꀋꐊꇓꈓꆠꀋꐊ
ꐂꇐꂾꃚꁴꍂꂿꃚꌡꇬꎷ
〈ꊯꌕ〉
ꏆꌠꈜꏆꄉꅊꇈ
ꀞꐈꃀꐈꃷꅍꐍꐷꀕꌠꈜꏆꄉ
ꑭꁘꄔꃚꎬꄵꂿꃅꂿꌠꉬ
ꀘꂾꈂꀸꃅꐬꅼꃅꅼꌠꉬ
〈ꊯꇖ〉
ꏃꃅꉬꉎꊪꌺꊔꌺꋍꅇꈨꇁꇬ
ꏂꑍꑿꑋꑓꁴꋍꄩꅐꑴꄸ
ꆿꆪꃅꆪꌦꅪꋍꄧꊰꑴꄸ
ꑓꁴꅐꌊꂷꊂꉃꑌꀈꈥꉃ
ꌦꅪꋊꌊꐰꇑꆦꑌꀈꈥꆦ
ꃰꊿꄡꇗꌿꐴꍠꌊꂷꐴꊛꏭꄐ
〈ꊯꉬ〉
ꇓꊸꌣ ꍍꅿꉼ
ꅇꂷꑵꌠꅅꃅꐛ
ꅅꃅꀖꌊꐋꐴꒇ
〈ꊰꃘ〉
ꇓꈓꑋꈌꉙꏦꀕꑠꑍ
ꃆꄔꏦꅉꐞꅉꑟꑠꉔ
ꎐꆈꏢꌌꎐꐎꏢꀠꎭ
〈ꊰꏁ〉
ꀄꂼꌠꌡ，ꄚꀄꂼꌠꑌꀋꉬ
ꎧꑱꌠꌡ，ꄚꎧꑱꌠꑌꀋꉬ
〈ꊰꉆ〉
ꇓꈓꆅꇖꃚꃅꄏꀕꆏꊌꈨꀐ
ꇓꈓꂷꊂꀱꋓꀕꌠꆏꊌꂿꀐ
ꄚ，ꇤꈏꃆꍀꀜꑴꌦ
ꃆꄔꆏꏦꁤꐞꄑꑴꌦ
〈ꊯꈬ〉
ꇓꈓꐬꇓꈁꐛꅉꃅꆈ，ꆈꅉꅱꅉꃅ
ꁍꁈꈄꌋꅱ
ꆧꑭꇂꃴꃺꅉꃅ，ꃺꅉꎹꅉꃅ
ꁍꃀꎔꌋꎹ
ꇓꏪꏜꀋꅿꅉꇬ，ꁖꐪꋍꐪꇬꁮꇈ
〈ꑍꊏ〉
ꇓꈓꈜꏍꈌꍈꌠ
ꑱꐎꄯꁮꄙꌊꇁꌠꑌꇬꏑ
ꑟꐎꈜꃅꍬꅷꇁꌠꑌꇬꏑ
〈ꑍꊏꋋ〉
ꒉꈫꄹꉈ
ꒉꈫꄯꁮꇿꇬꎹꁧꂯ
ꌩꋲꄹꉈ
ꌩꋲꃤꃀꇿꇬꊙꁧꂯ
〈ꑍꊏꑋ〉
ꃰꊿꉌꃀꇓꈓꐊꄉꈻꄂꀕꄮꇬ
ꃰꊿꉌꃀꆧꑭꐊꄉꁤꇅꀕꄮꇬ
ꆧꁨꇓꈓꊂꌒꅇꄜꍅꇙꀕ
〈ꑍꊎꌕ〉
ꆧꁨꇓꈓ
ꃨꌦꃨꌋꈧꌠ
ꑙꆪꃅꊸꇀꑌꃨ
ꃬꆪꃅꊸꇀꑌꃨ
ꈱꅇꈂꀸꀞꌊꈂꀸꇰ
〈ꑍꊎꇖ〉
ꃰꊿꄶꆠꈧꌠ
ꄶꆠꌊꉌꃀꁯꆮꃰ
ꌩꃨꂿꑌꌩꃨꄩꄉꃨ
ꁬꃨꂿꑌꁬꃨꄩꄉꃨ
〈ꑍꊎꉬ〉
ꎹꄓꉘꁮꅏꄮꅐ
ꁯꋒꉘꁮꈞꆈꃸꄮꃹ
〈ꑍꊏꃘ〉
ꆧꁨꇓꈓ ꀉꒉꐯꀉꒉ
ꀉꒉꌊꉌꃀꇬꀋꅓ
ꆧꁨꇓꈓ ꀄꊭꐯꀄꊭ
ꀄꊭꌊꑓꋪꇬꀀꌐ
〈ꑍꊏꏁ〉
ꀱꇁ，ꇭꀧꐥꅉꒌꆠꄂꃰꏿꈧꌠ
ꀱꇁ，ꒌꆠꆙꅜꅉꃅꒌꈎꐺꈧꌠ
ꀱꇁ，ꒌꈎꆠꈎꅇꂷꍅꇙꀕꈧꌠ
〈ꑍꊏꉆ〉
ꎺꏣꎿꒉꆈꃃꃆꌠꆎꇁꉚ
ꉂꏣꌩꏪꆈꊉꀕꌠꆎꇁꉚ
〈ꑍꊎꈬ〉
ꀄꂼꈌꏑꂰꌠꋍꋓꇈꋍꋓ
ꒌꆠꅇꐚꄜꌠꋍꂷꇈꋍꂷ
ꃰꊿꆏꒉꉡꇁꋍꁥꇈꋍꁥ
ꁍꎹꑗꎷꐺꌠꋍꋉꇈꋍꋉ
〈ꌕꊰ〉
ꇓꈓꋋꍈ
ꉘꁮꆧꁨꑌꁮꅉꀉꆹ
ꌩꏪꒊꃀꑌꁮꅉꀉꆹ
ꇓꈓꐩꋊꀊꅰꀉꆹ
ꆧꁨꐩꋊꀊꅰꀉꆹ
〈ꌕꊰꋋ〉
ꀎꋏꄚꄉꍀꅥꆿꅥ
ꊂꋊꄚꄉꍀꉘꆿꉘ
ꀎꋏꄚꄉꃆꉉꑘꉉ
ꊂꋊꄚꄉꏦꐆꃤꐆ
〈ꌕꊰꑋ〉
ꉂꌠꑌꄚꄉꐮꉂ
ꐞꌠꑌꄚꄉꐮꐞ
ꌂꌠꑌꄚꄉꐮꌂ
〈ꌕꊯꌕ〉
ꀉꁌꁮꅉꃅꆳꐊꄉꁏꇬꎷ
ꌺꇖꁮꅉꂷꉐꐊꄉꐛꇬꎷ
ꐩꋊꒊꃀꒉꂃꒊꆱꄓꇬꎷ
〈ꌕꊯꇖ〉
ꆧꁨꇓꈓ
ꌋꐓꈭꏂꂿ
ꌋꐓꇪꀮꂿ
ꌋꐓꃬꀮꂇ
ꀞꄂꉌꃀꍲꉀꌟꃅꉀ
〈ꌕꊯꉬ〉
ꇓꈓꊿꅉꀕꇓꈓꄉꈜꑽꌠ
ꉌꂵꋏꌊꂿꃅꃄꅉꀨꌠ
ꉦꃀꆗꌌꈧꌺꆪꌺꀨꌠꀋꃷꎵ
〈ꌕꊰꃘ〉
ꒌꆠꇓꈓꏹꄉꎼꃅꃏꑽꆧꁨꀨꈧꌠ
ꒉꏸꂿꄸꀋꉬꒉꈁꃃ
ꄔꇬꂿꄸꀋꉬꃆꄔꍂ
〈ꌕꊰꏁ〉
ꆧꁨꇓꈓꁮꅉꌌꁈꈧꌠ
ꈧꌺꌟꃅꌫꌦꆇꌦꃅꇬꎷ
ꆪꌺꌟꃅꍃꌦꐍꌦꃅꇬꎷ
〈ꌕꊰꉆ〉
ꌋꅪꆧꁨꍹ
ꌺꃰꉘꁮꋩ
ꌺꃰꌩꁐꋲ
ꌋꅪꃆꄔꏦ
〈ꌕꊯꈬ〉
ꀋꅞꉖꀄꂼꂻꅷꃅꄜ
ꌋꌊꃆꍀꀜꃅꇬꄉꀜ
ꃅꇴꑳꃶꃛꌠꇬꄉꄓ
ꌩꁧꀉꆹꈧꌠꌩꃨꃧꈍꀕ
ꇁꄿꒉꌤꈧꌠꒉꅐꆈꇽꀕ
〈ꇖꊰ〉
ꆧꁨꇓꈓ
ꆧꁨꉌꂵꂄꑭꑌꂶꌠ
ꂄꑭꑌꌊꒊꌋꀕ
ꆧꑭꑍꐎꊰꃅꊰ
ꊰꌊꃰꊿꉌꂵꋋꌌꐚꒉꐔꇬꎷ
……
